Iss Kavita Ka Koi Sheershak Nahin Hai

Maut,ek ankahi kavita ho tum
Chchandon mein ghuli andekhi,anjaani si
Anchuyee ek premika jo roz nae premi chunti hai
Ansamjha woh nasha jo sabhi ko apne aagosh mein bharta hai
Apni baahon mein le dulaarti ho,sabhi ko ek din
Ek anchaahi tamanna jo sabke mann ke kisi kone mein chupi baithi hai
Ansuni wo dhun jis per na chah kar bhi sab jhoomte hain ek din

Us ek din ka intezaar mujhe bhi hai
Jaane kab mujhe apni ghani zulfon ki chaanv mein sulaaogi
Jaane kab mujhe bhi apna premi banaaogi

Priye,ab der na karna
Tumhare nashe mein kho jaana chaahta hun jald hi,
Tumhari baahon mein so jaana chahta hun jald hi.

Maut,meri ansuni kavita ho tum.

Ashu

ABHILAASHA

ek Abhilaasha thi
lehron si chanchal,hawaaon si paagal
jaadon ke sooraj ki kirnon si komal
ek Abhilaasha thi
woh thi to jeevan mehekta tha mera
hota tha rangin mera har savera
usne hi to mujhko hansna sikhaaya
pathar dil mein bhi ek insaan jagaaya
woh toote dilon ki aasha thi
ek Abhilaasha thi
baarish ki chum chum si uski hansi thi
masti to uske ang ang mein basi thi
sang uske saara jahan khilkhilaata
masti mein uski sama doob jaata
woh chanchaltaa ki paribhaasha thi
ek Abhilaasha thi
meghon si saanwri thi uski soorat
saundarya-poorit saralta ki moorat
choo na saka tha gamo-dukh ka saaya
saare jahan ka tha sukh usne paaya
woh har kavi-mann ki jigyaasa thi
ek Abhilaasha thi
kehte hain jeevan to hai behta paani
jo janma hai usko hai mrityu bhi aani
woh hansti kali jo ab khilne lagi thi
bahaaron ke sapnon ko silne lagi thi
jaane kahan se woh toofaan aaya
zaalim ne aisa keher tha machaaya
chanta wo,to sabne pukaara kali ko
the bechain sunne ko uski hansi ko
par woh na jaane kahan kho chuki thi
antim chir-nidra mein woh so chuki thi
par ab bhi thi woh harek dil ki aasha
thi ab bhi chanchalta ki paribhaasha
ab bhi woh har kavi-mann ki jigyaasa thi
ek Abhilaasha thi

Ashu